Përfaqësuesi i Zyrës për Marrëdhënie Ndërkombëtare të Universitetit “Fehmi Agani” në Gjakovë, Bujar Nura, së bashku me zyrtaren ligjore Erlinda Rizvanolli Meqa, realizuan një vizitë zyrtare në Università degli Studi di Messina në Itali, në kuadër të forcimit të bashkëpunimit ndërinstitucional dhe avancimit të proceseve të ndërkombëtarizimit në arsimin e lartë.

Gjatë kësaj vizite, delegacioni i UFAGJ-së pati mundësinë të zhvillojë takime pune dhe vizita profesionale në disa nga njësitë më të rëndësishme administrative dhe akademike të universitetit partner, përfshirë Zyrën për Marrëdhënie Ndërkombëtare (IRO), Zyrën Ligjore, Rektoratin dhe Zyrën Erasmus+.

Në takimet e zhvilluara me përfaqësuesit e Università degli Studi di Messina, u diskutuan një sërë temash që lidhen me menaxhimin institucional, ndërkombëtarizimin e universiteteve, administrimin e marrëveshjeve ndërkombëtare dhe zbatimin e programeve Erasmus+. Vëmendje e veçantë iu kushtua shkëmbimit të përvojave mbi organizimin dhe funksionimin e zyrave ndërkombëtare, procedurat ligjore dhe administrative në kuadër të bashkëpunimeve akademike, si dhe mbështetjes që universiteti ofron për studentët dhe stafin ndërkombëtar.

Delegacioni i UFAGJ-së u njoh nga afër me praktikat dhe modelet që Universiteti i Messinës aplikon në proceset e mobilitetit ndërkombëtar, menaxhimin e dokumentacionit Erasmus+, procedurat e njohjes akademike dhe koordinimin institucional ndërmjet njësive administrative dhe akademike. Gjithashtu, u prezantuan format e mbështetjes për studentët ndërkombëtarë, digjitalizimi i shërbimeve universitare dhe strategjitë për rritjen e pjesëmarrjes në projektet evropiane.

Vizita në Rektorat ofroi mundësi për diskutime lidhur me vizionin institucional të universitetit italian në fushën e ndërkombëtarizimit, zhvillimit strategjik dhe zgjerimit të partneriteteve ndërkombëtare. Në këtë kontekst, përfaqësuesit e të dy universiteteve shprehën gatishmërinë për thellimin e bashkëpunimit në fusha të ndryshme akademike dhe profesionale.

Po ashtu, gjatë vizitës në Zyrën Ligjore u diskutuan aspektet juridike të marrëveshjeve ndërinstitucionale, procedurat për bashkëpunime ndërkombëtare, standardet evropiane të administrimit universitar dhe rëndësia e harmonizimit të dokumentacionit institucional me praktikat evropiane.

Në kuadër të vizitës në Zyrën Erasmus+, u trajtuan mundësitë për zgjerimin e mobilitetit të studentëve dhe stafit akademik, shkëmbimin e praktikave më të mira në menaxhimin e projekteve Erasmus+, si dhe mundësitë për zhvillimin e iniciativave të përbashkëta akademike dhe profesionale në të ardhmen.

Kjo vizitë përfaqëson një hap të rëndësishëm drejt forcimit të bashkëpunimit ndërkombëtar të Universitetit “Fehmi Agani” në Gjakovë, duke kontribuar në avancimin e proceseve të ndërkombëtarizimit, zhvillimin institucional dhe krijimin e partneriteteve të qëndrueshme me universitete evropiane.