Në kuadër të përpjekjeve të vazhdueshme për fuqizimin e qëndrueshmërisë financiare dhe ngritjen e cilësisë akademike, në Universitetin "Fehmi Agani" në Gjakovë u mbajt një takim i rëndësishëm punues i fokusuar në planifikimet buxhetore strategjike. 

Në këtë takim morën pjesë dekanët e njësive akademike dhe zyra e financave të Universitetit.

Takimi u zhvillua në formë hibride, duke ndërthurur pjesëmarrjen fizike me atë online. Ky takim mundësoi përfshirjen e të gjithë akterëve kyç për zhvillimin e një dialogu dinamik e gjithëpërfshirës Institucional.

Në qendër të diskutimeve ishte analiza e detajuar e buxhetimit për programet aktuale të studimit, me synim optimizimin e burimeve ekzistuese dhe përmirësimin e kushteve mësimore e hulumtuese. Gjithashtu, vëmendje e veçantë iu përkushtua planifikimit financiar për programet e reja që pritet të aplikohen gjatë periudhës pesëvjeçare 2026–2030.

Diskutimet mbuluan nevojat prioritare si në nivel të Rektoratit, ashtu edhe në të gjitha njësitë akademike, duke siguruar që çdo iniciativë e re akademike të mbështetet nga një bazë e qëndrueshme financiare.

Përmes këtij procesi të planifikuar strategjik, Universiteti "Fehmi Agani" në Gjakovë rikonfirmon përkushtimin e tij për të garantuar transparencë, menaxhim efektiv të financave publike dhe përmbushje të standardeve më të larta akademike.