Universiteti “Fehmi Agani” në Gjakovë (UFAGJ) ka nënshkruar një Memorandum Mirëkuptimi (MoU) me Universitetin Teknik Tafila (Tafila Technical University - TTU) nga Jordania, me qëllim të krijimit të një kornize bashkëpunimi afatgjatë në fusha të ndryshme akademike dhe kulturore. Ceremonia e nënshkrimit u mbajt  në Gjakovë, duke shënuar një moment të rëndësishëm në rrugëtimin e ndërkombëtarizimit të këtij institucioni.

Ky memorandum përcakton një sërë fushash të bashkëpunimit ndërmjet dy universiteteve, përfshirë shkëmbimin e studentëve dhe stafit për qëllime studimore, mësimdhënie dhe kërkime shkencore, organizimin e konferencave, seminareve dhe punëtorive të përbashkëta, si dhe realizimin e projekteve të përbashkëta hulumtuese në fusha si arsimi, gjuhët, shkencat sociale dhe teknologjia informative.

Po ashtu, MoU-ja parasheh zhvillimin e programeve të përbashkëta të studimeve në nivelin bachelor dhe master, përmes hartimit të kurrikulave të përbashkëta dhe ofrimit të mësimit të koordinuar. Një tjetër komponent i rëndësishëm është promovimi i gjuhës shqipe dhe arabe përmes kurseve të përbashkëta dhe shkëmbimeve kulturore, me synim të thellimit të mirëkuptimit ndërkulturor.

Për zbatimin e marrëveshjes, palët do të caktojnë koordinatorë institucionalë dhe do të themelojnë një grup të përbashkët pune që do të mbikëqyr realizimin dhe vlerësimin e aktiviteteve të përbashkëta. 

Memorandumi është nënshkruar nga Rektori i Universitetit Teknik Tafila, Prof. Dr. Bassam Almahasneh dhe Rektori i Universitetit “Fehmi Agani” në Gjakovë, Prof. Ass. Dr. Drilon Bunjaku, të cilët theksuan rëndësinë e këtij partneriteti për fuqizimin ndër institucional në fushën e arsimit dhe punës shkencore. Rektori Bunjaku potencoi që një partneritet me një Universitet prestigjioz siç është Universiteti Teknik i Tafilias nga Jordani (Tafilia Technical University) hap dyrët e bashkëpunimeve të reja në të gjitha fushat, mirëpo në veçanti në fushën e Shkencave Aplikative.