Me datë 23.12.2025, në kuadër të veprimtarive të Qendrës Didaktike për Përsosmëri në Mësimdhënie (QDPM) në Universitetin “Fehmi Agani” në Gjakovë, u organizua ceremonia e shpërndarjes së certifikatave për studentët tutorë, të cilët kanë qenë të angazhuar gjatë semestrit veror të vitit akademik 2024/2025 në të gjitha njësitë akademike të Universitetit.

Në këtë aktivitet morën pjesë udhëheqësja e QDPM-së, Prof. Dr. Sindorela Doli, u.d. udhëheqësja e Zyrës për Sigurimin e Cilësisë, znj. Qëndresa Bardhoshi, si dhe studentët tutorë të këtij semestri, të cilët kanë kontribuar drejtpërdrejt në mbështetjen akademike të studentëve të Universitetit.

Takimin e hapi Prof. Dr. Sindorela Doli, e cila në fjalën e saj përshëndetëse falënderoi studentët tutorë për përkushtimin, përgjegjësinë dhe punën e palodhshme, duke theksuar rolin e rëndësishëm që sistemi tutorial ka në përmirësimin e cilësisë së mësimdhënies dhe rritjen e rezultateve akademike të studentëve. Ajo vlerësoi angazhimin e tyre si një shembull të mirë të bashkëpunimit ndërmjet studentëve dhe strukturave akademike të Universitetit.

Gjatë takimit, studentët tutorë patën mundësinë të ndajnë përvojat e tyre praktike, të diskutojnë mbi sfidat e hasura gjatë procesit të tutorimit, si dhe të prezantojnë praktika të mira dhe sugjerime për avancimin e mëtejmë të këtij programi në të ardhmen. Diskutimi u vlerësua si konstruktiv dhe i dobishëm për përmirësimin e vazhdueshëm të këtij mekanizmi mbështetës për studentët.

Në përmbyllje të aktivitetit, u bë ndarja e certifikatave për të gjithë studentët tutorë, si shenjë mirënjohjeje dhe vlerësimi institucional për kontributin e tyre akademik dhe profesional. Universiteti “Fehmi Agani” në Gjakovë mbetet i përkushtuar në fuqizimin e roleve aktive të studentëve dhe në promovimin e iniciativave që kontribuojnë në cilësinë dhe përsosmërinë në mësimdhënie.