Sipas të dhënave të publikuara në Webometrics, në edicionin e janarit 2022 të rangimit, Universiteti “Fehmi Agani” në Gjakovë dukshëm ka shënuar progres, duke u ngritur për 1827 pozita më lartë nga viti 2021, i renditur në pozitën e 17685 në nivel botëror.

Prof. dr. Blerim Rexha, profesor në Fakultetin e Inxhinierisë Elektrike dhe Kompjuterike në Universitetin e Prishtinës ka shkruar rreth rangimit të universiteteve publike dhe private të Kosovës në Webometrics, ndërsa ka cituar Universitetin “Fehmi Agani” në Gjakovë, duke thënë se: “Nëse analizohen me kujdes numrat e përmbledhur në pesë vitet e fundit, shihet qartë se Universiteti i Gjakovës gradualisht ka bërë progres çdo vit”.

Universiteti “Fehmi Agani” në Gjakovë vazhdon të jetë i përkushtuar në zhvillimin e mëtejmë në fushën e kërkimit shkencor, duke mbështetur dhe përkrahur projektet dhe hulumtimet e stafit akademik dhe të studentëve.

Webometrics është ranglista më gjithëpërfshirëse e vlerësimit të institucioneve të arsimit të lartë, në të cilën vlerësohen mbi 31 mijë universitete nga e gjithë bota. Rangimi sipas Webometrics merr për bazë njohjen e nivelit të mirë të punës shkencore të botuar, si dhe përmbajtjen dhe shpërndarjen e informacionit nga burimet elektronike nga institucionet përkatëse.

Transparent Ranking, siç quhet lista e top universiteteve nga citimet në Google Scholar, publikohet nga Këshilli i Lartë për Kërkime Shkencore i Spanjës, pjesë e të cilit është edhe grupi hulumtues Cybermetrix LAB.