Universiteti i Gjakovës “Fehmi Agani” në bashkëpunim me Klubin Letrar “Gjon Nikollë Kazazi” sot mbajtën Akademi përkujtimore për 9 vjetorin e vdekjes dhe 90 vjetorin e lindjes së profesorit dhe poetit Din Mehmeti.

Të pranishëm në këtë akademi ishin përfaqësues të universiteteve publike, institucioneve lokale, deputetë dhe familjarë të poetit Din Mehmeti.

Akademia u hap me deklamimin e vargjeve poetike të Din Mehmetit nga ana e aktorit të mirënjohur Rrustem Latifaj. Më pas të pranishmit i përshëndeti Rektori i Universitetit të Gjakovës prof.ass.dr. Artan Nimani i cili tha se emri i poetit Din Mehmeti do të ngelet në mbamendje të kombit tonë si një ideolog, poet, profesor dhe atdhetar i pashoq por edhe Mësues i urtësisë së njerëzimit. Ai vuri në pah se misioni i poetit ishte aq sublim sa për studentët aq edhe për studiuesit, duke pasqyruar origjinalitetin e botës shqiptare, vizionin stoik të malësorëve e kullave shqiptare, pra duke pasqyruar rrugën që është sa e lavdishme aq edhe e ndritshme, për brezat tanë.

Rektori Nimani më tej sqaroi se Senati i Universitetit të Gjakovës ka themeluar Çmimin “Din Mehmeti”, si çmimin më të lartë për krijimtarinë letrare, çmim në fushën e kritikes dhe studimit letrar, i cili do të jetë tradicional dhe çdo vit do të mbështet krijuesit që ecin rrugëve të Bacalokut tonë.

Në akademi u lexuan edhe kumtesa nga studiues të letrave shqipe si nga profesori Agim Vinca, shkrimtari Adem Gashi, profesori Besim Muhadri si dhe kryetari i klubit letrar “Gjon Nikollë Kazazi” Muharrem Kurti.

Në fund Rektori Nimani në emër të Universitetit “Fehmi Agani” i ndau Mirënjohje postmortum poetit dhe profesorit Din Mehmeti, me motivacion: Për kontribut të jashtëzakonshëm në fushën e poezisë dhe të arsimit.