Të  nderuar profesorë, staf administrativ dhe bashkëpunëtorë të Universitetit “Fehmi Agani” në Gjakovë!
Të dashur studentë!

Në emrin tim dhe të menaxhmentit të Universitetit “Fehmi Agani” në Gjakovë po ju përcjell urimet e mia më të mira në këtë ditë të shënuar të Flamurit dhe të Pavarësisë së Shqipërisë. 

Kjo ditë madhështore na rikujton rrugën e gjatë të sakrificës dhe vizionit të atyre që ndërtuan themelet e lirisë sonë kombëtare. 28 Nëntori na fton të reflektojmë mbi detyrimin që kemi për të forcuar arsimin, kulturën dhe zhvillimin shoqëror, duke e parë dijen si mjetin më të fuqishëm për përparim.

Le të frymëzohemi nga kjo ditë për të punuar me përkushtim në ndërtimin e një universiteti edhe më cilësor, më inovativ dhe më të hapur ndaj sfidave të kohës. Kjo festë le të na shërbejë si motiv për angazhim më të madh në edukim, kërkim dhe kreativitet, sepse përmes dijes dhe bashkimit ndërtojmë një të ardhme më të ndritur.

Gëzuar Festa e Flamurit dhe e Pavarësisë!

Me respekt të veçantë, 
Prof. Ass. Dr. Drilon Bunjaku, Rektor.